DSC_0327

Të rinjtë/rejat e komuniteteve të Kosovës së bashku në trajnimin “Edukimi i bazuar në teatër”

22 – 24 Janar 2021

Çfarë ndodh kur të rinjtë nga komunitete të ndryshme në Kosovë takohen të interesuar për të zotëruar aftësitë e aktrimit, performancën dhe teknikat e teatrit? Ndodh Forum Teatër!

Pjesëmarrësit e trajnimit “Edukimi i Bazuar në Teatër” patën mundësinë të shijojnë përgatitjen dhe shfaqjen e skenave teatrore dhe punën krijuese nga 22 deri më 24 Janar. Ata mësuan për teknikat e teatrit, për Forum Teatër e njëkohësisht përmes lojërave dhe aktrimit trajtuan tema të ndryshme sociale me fokus në bashkëjetesën multietnike.

Trajnimi 3 ditor “Edukimi i Bazuar në Teatër” u mbajt në Prizren, organizuar nga anëtarët e Koalicionit të Kosovës për Pajtim, Artpolis dhe NGO Aktiv.

Të gjitha aktivitetet u kryen në përputhje me rekomandimet për parandalimin e përhapjes së virusit kovid-19.

#artpolis#aktiv#kcr#thbe

121674037_3487542864648420_3072733853840428123_o

Femart 8-të publikon raportin “Drejt Solidaritetit dhe Bashkëpunimit” – me një konferencë ndërkombëtare shpalosi të arriturat e grave dhe atë se çka duhet bërë tutje

Insajderi / 19.10.2020

Përmes publikimit të raportit me titull  “Drejt Solidaritetit dhe Bashkëpunimit” dhe konferencës ndërkombëtare, Festivali Femart, i cili ka nisur rrugëtimin e tij të tetë me moton “Solidaritet dhe Qëndrueshmëri”, solli ditën e dytë të tij (16 tetor) me një diskutim të thellë për barazinë gjinore, me theks të veçantë nëpër institucione të kulturës por jo vetëm.

Përveç publikimit të raportit, kjo konferencë ndërkombëtare u përbë nga dy panele të ndryshme të me gra të fuqishme të Kosovës dhe jashtë saj. Ndwrsa e gjithë kjo erdhi nën modelimin e shkëlqyer të Donika Eminit.

Në publikimin e raportit, pjesëmarrëse ishin  ministrja e Kulturës, Rinisë dhe Sportit – Vlora Dumoshi, Nasrin Pourghazian – Zëvendëse e Shefit të Misionit, Shefe e Bashkëpunimit për Zhvillim dhe Gresa Rrahmani – autore e raportit.

Raporti i publikuar nga Femart, sjellë në pah edhe njëherë neglizhencën e institucioneve karshi zbatimit të ligjit për barazi gjinore.

Në lidhje me këtë, ministrja e Kulturës, Rinisë dhe Sportit, Vlora Dumoshi, e cila edhe bëri hapjen e këtij publikimi, tregoi se e ka lexuar me vëmendje këtë raport dhe e ka shikuar me kujdes analizën që është dhënë. Ajo tha se ky raport është i mirëseardhur dhe pritet të merret parasysh në aspektin e përmirësimit, teksa tregoi përvojën e saj dhe punën disa vjeçare në shkollimin e grave.

“Nëse e shohim historikisht, roli i gruas në vend, lë për të dëshiruar, por këtë duhet ta qesim në dy rrafshe, rrafshi i parë është sa janë gratë të gatshme të marrin vende udhëheqëse. E pash që në raport ka dalë që në ligjet e institucioneve tona nuk shkruhet që edhe gruaja duhet të marrë pjesë, mendoj që është ligji për barazi gjinore dhe kushtetuta dhe besoj që në ligje të mos ceket as mashkulli as femra, pra të jemi të barabartë”, ka theksuar Dumoshi.

Ajo tutje ka folur për institucionin që e drejton dhe në lidhje me numrin e grave që punojnë aty.

“Në MKRS diku prej 579 punonjësve ne kemi 252 gra, kemi tri drejtoresha dhe kemi udhëheqëse të divizioneve të ndryshme. Në institucione kemi pas dy gra udhëheqëse, tash kemi një pasi që, njërës i ka kaluar mandati”, pohoi ministrja.

Ndërsa si një pjesë të rëndësishme që ajo e ceku, është që problemi përveç të tjerash qëndron edhe te gratë, pasi që, sipas saj, gratë nuk mbështesin gratë.

“Si pjesë e stafit të ish-qeverisë, kam parë që në pjesë të ndryshme të ndërmarrjeve publike ka pas shumë pak gra që kanë konkurruar në pozita të larta, dhe sfida që e shohë është që gratë nuk i mbështesin gratë. Nisim nga votimet e tutje, pra ne duhet ta mbështesim njëra tjetrën. Kudo që menaxhojnë gratë institucioni është më i mirë, pasi që, e marrin punën me seriozitet”, u shpreh ajo.

Duke theksuar kënaqësinë që është pjesë e këtij edicioni të Femart, Nasrin Pourghazian – Zëvendëse e Shefit të Misionit, Shefe e Bashkëpunimit për Zhvillim, u shpreh e lumtur për këtë raport derisa ajo foli në përgjithësi për energjinë pozitive dhe të rinjtë kreativ që i ka takuar në këtë festival.

“Jam e lumtur që solidariteti dhe bashkëpunimi janë kryefjalët e këtij eventi. Personalisht jam fanse e madhe e artit por mendoj që solidariteti është shumë i rëndësishëm kur dëshiron të ndryshosh qasjen në shoqëri”, theksoi ajo.

Pas kësaj hyrje, i erdhi radha edhe pjesës kryesore të ngjarjes. Publikimi i raportit, erdhi me një prezantim fantastik nga autorja Gresa Rrahmani.

Rrahmani sqaroi në detaje të gjitha pikat e përmbledhura në këtë hulumtim dhe sfidat nëpër të cilat kaloi ajo me bashkëpunëtorët, duke pas parasysh këtu edhe kufizimet që erdhën si pasojë e parandalimit të pandemisë COVID-19.

Autorja fillimisht tha se ky është një produkt i komunitetit e jo vetëm i saj.

“Qëllimi i hulumtimit fillimisht ka qenë kur jam takuar me Zanën kemi dashtë me e pa kur gratë arrijnë në pozita të pushtetit dhe vendimmarrëse, atëherë çfarë ndikimi ka kjo për shoqërinë, a ndikon kjo në përmirësimin e grave tjera, personave me aftësi të kufizuara, komunitetit LGBTI, e kështu me radhë. Rrjedhimisht me këtë jemi nis dhe gjatë hulumtimit e kemi parë që situata nuk është ashtu siç kemi mendu, dhe e kemi parë që gratë janë shumë pak në pozita drejtuese”, theksoi ajo.

Ajo tregoi se për arsye se fusha e kulturës është shumë e gjerë, atëherë janë fokusuar vetëm në institucionet brenda Ministrisë së Kulturës, që janë: Teatri Kombëtar i Kosovës, Galera Kombëtare e Kosovës, Galeria Qafa,  Ansambli Shota, Filarmonia e Kosovës, Qendra Kinematografike e Kosovës…

“Kritika feministe ka vënë në pah dy ndarje shumë të rëndësishme të cilat janë përdorur gjatë hulumtimit, ndarja publike dhe private”, pohoi ajo, derisa theks të veçantë i dha edhe ligjit për barazi gjinore.

“Ligji për barazi gjinore paraqet barazinë prej 50% në të gjitha institucionet, do të thotë, coftë në ministri coftë në institucione të kulturës, gratë pritet të jenë 50%, dhe obligohen që të gjitha institucionet të punojnë në këtë drejtim”, u shpreh Rrahmani.

Pas këtij prezantimi, diskutimi u hap edhe për publikun ku aty patën rastin të paraqesin mendimet dhe kritikat e veta të gjithë pjesëmarrësit.

Me shumë pak minuta pauze, Në Teatrin Oda, ku u mbajt krejt kjo ngjarje, filloi edhe konferenca ndërkombëtare me dy panele.

“Përfaqësimi i grave në shoqëri civile, media dhe institucione të kulturës” – Perspektiva ndërkombëtare dhe vendore

Paneli i parë u përbë nga Tenzin Dolke – Aktiviste dhe Feministe, Blerta Basholli – Drejtoreshë e drejtorisë së kulturës në komunën e Prishtinës, Nermina Mahmuti- Drejtoreshë Ekzekutive, Fondi për zhvillim komunitar dhe Lian Bell – Artiste.

Fillimisht përmes Zoom, u lidhen Tenzin Dolke – Aktiviste dhe Feministe dhe Tijana Simić LaValley – Drejtore e programit në OJQ “Të drejtat e grave” dhe aktiviste për të drejtat e grave, të cilat paraqitën perspektivat e tyre në aspekt me temën në fjalë.

Teksa Nermina Mahmuti dhe Blerta Basholli, derisa komentuan raportin e publikuar, ato treguan edhe përvojat e tyre, dhe projektet të cilat janë në ndihmë të grave.

“Përfaqësimi i grave në shoqëri civile, media dhe institucione të kulturës në Kosovë”

Ishte paneli i dytë i cili përbëhej nga: Saranda Bogujevci – Anëtare e Parlamentit të Republikës së Kosovës, Valdete Idrizi – Anëtare e Parlamentit të Republikës së Kosovës, Ivane Petronic Vanovac – Radio KM, Luljeta Demolli – Drejtoreshë Ekzekutive – Qendra Kosovare për Studime Gjinore dhe Tijana Simić LaValley – Drejtore e programit në OJQ “Të drejtat e grave” dhe aktiviste për të drejtat e grave.

Ky diskutim nisi me dy deputetet në Kuvendin e Kosovë, Valdete Idrizin dhe Saranda Bogujevci, të cilat përmes zbërthimit të raportit, edhe njëherë dhanë gjithë energjinë e tyre në ndihmë ndaj grave dhe në promovimin e tyre.

“Unë personalisht gjithmonë do të jem dhe jam në përkrahjen e grave, atë minutë që nuk do të jem, nuk do ta bëjë asnjë punë të mirë në këtë shoqërinë tonë”, tha Idrizi.

Ndërsa deputetja Bogujevci, pati një kërkesë sa i përket shpërndarjes së raportit.

“Ky raport duhet të dërgohet edhe në komisionin për barazi gjinore që kemi në parlament, por njëjtë edhe në grupin e grave dhe të shpërndahet të te gjithë deputetët. Mendoj që ka elemente të rëndësishme brenda raportit që duhet me i pa edhe në nivel parlamentar”, tha ajo, duke aluduar se kjo hap rrugë edhe për diskutim përbrenda parlamentit.

Ky raport, ishte prurje e re në vend, teksa Femart, vazhdon të sjellë edhe ditët në vijim gjëra interesante e të reja, gjithmonë në të mirën e komunitetit këtë edicion të tetë, ashtu sic ka bërë edhe edicionet e kaluara.

Kujtojmë se edicioni i tetë i FemArt përkrahet nga:

Donatorët: Bashkimi Europian, Koalicioni i Kosovës për Pajtim, Ambasada e Suedisë në Kosovë/Agjencia Suedeze për Zhvillim Ndërkombëtar – Sida, Fondi për Zhvillim Komunitar – CDF, Kvinna till Kvinna, UNFPA, Ministria e Kulturës, Rinisë dhe Sportit, Komuna e Prishtinës, Cfd, Ambasada Amerikane në Kosovë, Koalicioni K10.

Përkrahësit Institucional dhe medial: Teatri Oda, Biblioteka Kombëtare e Kosovës, Fakulteti i Arteve – Universiteti i Prishtinës, Etno Fest, Hapu – Festivali i Artit në Hapësirë Publike, KultPlus, Selman Netëorks, Rikon, Frutomania, Dukagjini, mik-mik, T-shirt collective, Blue Taxi, Ymalko.

129018777_10224000977629532_418200581225209010_o

Shkolla Pranverore Feministe 2020 – Virtualisht në pjesën e dytë

01 – 03.12.2020

Nga data 01 – 03 dhjetor 2020, u mbajt pjesa e dytë e shkollës pranverore feministë për Kosovë dhe Serbi. Për dallim nga vitet e kaluara ku vajzat e Kosovës udhëtuan në Sërbi, si pasojë e Covid-19, kjo pjesë u mbajt vetëm online, nga distanca, si masë mbrojtëse për shkak të situatës pandemike të përkeqësuar në dy shtetet e Ballkanit.

Për tre ditë radhazi vajzat nga Kosova dhe Serbia, u bashkuan virtualisht për të ndëgjuar ligjëratat e folëseve të mrekullueshme, të cilat arritën të mbajnë interesimin e pjesëmarrësve deri në minutat e fundit të seansave. Edhe pse nga distanca gratë e reja – pjesëmarrëset ishin mjaft interaktive duke kërkuar informata, duke punuar në grupe dhe duke bërë pyetje shume qenësore për ligjërueset.

Anita Pantelić, Marijana Stojčić, Marijana Toma dhe Ajna Jusić ishin ligjërueset që shtjelluan temat si: “Historia e pozitës së gruas dhe organizimit në gjysmën e dytë të shekullit të 20-të në ish-Jugosllavi”; “Qasja feministë në drejtësi: Rezoluta 1325 e këshillit të sigurimit të KB dhe gjykata e grave”; “Mekanizmat e drejtësisë tranzicionale” dhe “Fëmijët e harruar të luftës”, dedikuar fëmijëve të lindur pasi nënat e tyre i mbijetuan dhunës seksuale gjatë luftërave të fundit në Bosnjë dhe Hercegovinë.

Seanca u mbyll me një vlerësim nga pjesëmarrëset të cilat u shprehën jashtëzakonisht të kënaqura me informacionet që u shkëmbyen gjatë këtyre 3 ditëve dhe me shpresën se së shpejti ky grup do të takohet edhe fizikisht, ashtu si premtuan organizatoret nga Serbia.

Një falënderim të veçantë për organizatoret nga Alternativni Centar za Devojke nga Serbia, për punën e tyre profesionale që ky takim të shkojë mirë dhe të tejkalohen pengesat teknike lehtësisht.

Projekti “Gratë e reja ndërtojnë paqen në Kosovë dhe Serbi” implementohet në bashkëpunim me Artpolis-Qendr për Art dhe Komunitet dhe “Alternativni centar za devojke“ ndërsa përkrahet nga Unioni Evropian në Kosovë dhe Kvinna till Kvinna.

#FSS#FeministSpringSchool#ShkollaPranveroreFeministe#FeminističkaProlećnaškola#YoungWomenBuildPeace2020#EU#KCR#Artpolis
#AlternativniCentarZaDevojke

kcr

Sa më shumë gjuhë që flet, aq më shumë vlen

Nora Bezera

Kjo fjali më ndiqte gjithë jetën time si fëmijë dygjuhësh. Nuk më ka përndjekur, por përcolli ritmin tim të jetës midis dy qyteteve dhe dy popujve.

Më lejoni të prezantohem, unë jam Nora, një shqiptare që kam lindur dhe jetuar në Beograd për 27 vjet. Dhe tani, në moshën 32 vjeçare, po përpiqem të ndërtoj ura të shkatërruara midis dy popujve që jetojnë kaq afër, e megjithatë aq larg! 

Pyesni veten se si mund të bëhet kjo në një situatë çmendurie të përgjithshme kolektive në Ballkan? Epo, të filloj nga fillimi…

Kjo ishte saktësisht 13 vjet më parë. Në atë kohë, unë isha maturante në Gjimnazin e 12-të të Beogradit. Më sillej në kokë se çfarë të regjistroja, në cilin fakultet, çka tutje?? Dhe kështu, pak me nxitjen e nënës sime, dhe shumë më tepër rastësisht, vendosa të regjistroj gjuhën shqipe, madje as duke imagjinuar se pikërisht kjo zgjedhje do të ndryshonte jetën time për 180 gradë. Kush do ta kishte menduar atëherë? Regjistrova gjuhën amtare, çfarë mund të ndryshojë kaq shumë!? 

Pas 4 vitesh studimi, përmes punës, takova sot shoqen time më të mirë Jellenën! Ne u takuam në orët private të gjuhës shqipe, ngadalë filluam të bashkëpunojmë në projekte të tjera të rëndësishme dhe u afruam aq shumë saqë u bëmë shoqet më të mira! Një nga hulumtimet më të mira dhe më të mëdha që kemi kryer është mbi të drejtat gjuhësore në Kosovë. Pse jeta ime ndryshoi me Jellenën?! Jellena në fakt më mësoi të mendoja në mënyrë kritike dhe objektive, dhe akoma të ruaj ndjenjat dhe anën time subjektive përmes tregimeve që ajo i dëgjoi në Kosovë si nga serbët ashtu edhe nga shqiptarët dhe të cilat mi tregoi pas çdo udhëtimi të saj në Kosovë. Këto ishin tregime të përpjekjeve të përditshme të përbashkëta të të gjithë neve.

Pastaj në vitin 2015 u punësova në Prishtinë. Fillova të punoj si përkthyese. Duke punuar si përkthyese, takova shumë njerëz nga komunitete, fe dhe kultura të ndryshme. Pikërisht këtu jeta ime u pasurua. Kalova shumë kohë duke biseduar me pjesëtarët e komuniteteve jo-shumicë në Kosovë për zakonet dhe traditat e tyre. Dëgjova për festimet e tyre, por edhe për problemet që na mundojnë të gjithëve çdo ditë. Me ta, u mësova të dëgjoj problemet, dhimbjet, gëzimet e tyre, por edhe të më dëgjojnë. Të flasim për gjithçka në mënyrë njerëzore dhe me mirëbesim. Të ofrojmë një mundësi për ta njohur dhe kuptuar më mirë njëri-tjetrin. Kështu filluam të ndërtojmë parajsën tonë të vogël të të gjitha komuniteteve në Kosovë ku mezi prisnim çdo udhëtim së bashku. Ne në të vërtetë sa jemi të ndryshëm, në të njëjtën kohë jemi edhe të ngjashëm.

Kam përkthyer në takime me zyrtarë të lartë, por ato takime nuk janë më të vështirat. Fatet e njerëzve të zakonshëm ishin ato që thjesht më morën frymën, më zhdukën fjalët dhe “truri im i përkthimit” thjesht u shua. Të përkthesh dhimbjen, trishtimin, vuajtjen e dikujt, mallin për dikë, është pjesa më e vështirë dhe më e përgjegjshme e punës sime.

Shumë herë kam qenë në situata kur thjesht nuk mund të përktheja rrëfimet e njerëzve të zakonshëm, aq tronditëse për mua, saqë fyti më shtrëngohej dhe sytë më mbusheshin me lot. Dikujt kjo mund t’i duket si joprofesionale, por është thjesht më e fortë se unë, kur dëgjoj dhe kuptoj, bashkëndiej palën tjetër, të mbetem plotësisht e pandjeshme.

Një prej tyre është rrëfimi i një gruaje të dhunuar i lexuar nga Igballe Rogova në një nga takimet. Rrëfimi ishte aq i dhimbshëm, e aq më tepër që edhe unë jam grua. Në ato momente, thjesht nuk kisha forcë të vazhdoja të përktheja, nuk mund t’i kontrolloja emocionet që më pushtuan. Lotët më rridhnin në fytyrë, duart më dridheshin dhe falë Zotit, Igballja përfundoi me prezantim të tmerrshëm. Ishte hera e parë që unë u ballafaqova drejtpërdrejtë me fatet e tmerrshme të njerëzve në Kosovë.

Herën e dytë, nuk isha në rolin e përkthyeses dhe mirë që nuk isha. Me ftesë të Jellenës, mora pjesë në një konferencë të organizuar me temën për gazetarët e vrarë dhe të rrëmbyer gjatë dhe pas luftës në Kosovë. Familjet e gazetarëve shqiptarë dhe serbë, të cilët nuk janë më, janë ulur në të njëjtin vend. Askush prej tyre nuk e di saktësisht se çfarë ka ndodhur me të dashurit e tyre dhe ata ndajnë të njëjtën vuajtje dhe trishtim. Sytë e tyre, plot shpresë se do të mësojnë diçka për fatin e tyre pas gjithë kësaj kohe. Në fytyrat e tyre nuk ishte më e shkruar unë jam serb apo shqiptar, në fytyrat e tyre ishin vetëm sytë e trishtuar që kujtojnë bashkëshortët, baballarët, vëllezërit e tyre… Dhimbja e tyre është e njëjtë! Të dinjitetshëm me dhimbjen e tyre, kërkojnë të vërtetën e humbur prej kohësh. Kur Jellena filloi të flasë, pesha e fjalëve të saj ra mbi mua, veçanërisht pasi Jellena është “motra ime e madhe”. E pashë dhe ndjeva me çfarë dhimbje dhe dhembshurie ajo flet për atë temë. E di se sa është përpjekur që të flitet për të dyja palët në mënyrë të barabartë, dhe e di se, pavarësisht sa profesionale është në punën që bën, ishte pushtuar nga emocionet për shkak të fateve të tmerrshme dhe të vështira. Ishte e vështirë për mua, dhe e di që për te ishte edhe më e vështirë derisa fliste. Shikonte drejtë në mua dhe sado që isha në prag të të qarit, duhej të qëndroja e fortë, sepse Jellena më kërkoi. Përfundoi!

Thonë se nëse i flisni njeriut në një gjuhë që ai e kupton, i hyn në kokë. Nëse i flisni njeriut në gjuhën e tij, i shkon në zemër. Fuqimisht besoj se vlera dhe përparësia ime më e madhe është se sot mund të bisedoj me serbët dhe shqiptarët, t’i kuptojë dhe të më kuptojnë. Duke u rritur “në mes të urës” më mësoi të vëzhgoj, të dëgjoj, të përpiqem të kuptoj të gjithë ata njerëz që kalojnë nëpër të. Njohja e të dy gjuhëve më ka hapur shumë dyer, dhe më ka afruar shumë me njerëz të mirë me të cilët shoqërohem dhe bashkëpunoj.

Njohja e gjuhës na lejon të njohim pikëpamje të ndryshme, të përparojmë dhe të mos qëndrojmë në të njëjtin vend, të bëjmë miq kudo që jemi. Të kuptojmë më mirë njëri-tjetrin, në momente të vështira dhe të gëzueshme.

Nora Bezera lindi më 9 tetor 1987 në Beograd. Në vitin 2017 përfundoi gjimnazin e 12-të të Beogradit dhe në të njëjtin vit u regjistrua në Fakultetin Filologjik, Universiteti i Beogradit, Departamenti i Gjuhës Shqipe. U diplomua në vitin 2011. Në të njëjtin vit u regjistrua në studime master, drejtimi: gjuhë, letërsi, kulturë në Fakultetin Filologjik, dhe i përfundoi në vitin 2012 me notë mesatare 10.00. U regjistrua në studimet e doktoratës në Fakultetin Filologjik në vitin 2012, por nuk i vazhdoi.

Si lektore në Katedrën e Albanologjisë punon që nga viti 2017. Që nga viti 2010 në mënyrë aktive merret me përkthim dhe bashkëpunon me shumë agjenci dhe OJQ në Kosovë dhe rajon.

Peer to peer ALB1024_1

PEER-TO-PEER – Ngjarje kulturore

Bazuar në logjikën e drejtpërdrejtë, programimi i qasjes People-to-People (P2P) përpiqet të krijojë mundësi për një sërë ndërveprimesh midis grupeve konfliktuale në mënyrë që të promovojë mirëkuptimin, besimin, ndjeshmërinë e ndërsjellë dhe lidhjet elastike shoqërore.

Aktivitetet janë krijuar për të ndjekur logjikën lineare të programit P2P: kuptimi – vlerësimi – bashkëpunimi, duke krijuar kështu marrëdhënie shkaktare midis interesave të përfituesve dhe objektivave të ndërhyrjes.  


Për më shumë rreth aktiviteteve klikoni në këtë link: 

Movie screening Renion poster_page-0001

REUNION – Shfaqje e filmit

REUNION – Shfaqje e filmitFilm dokumentar nga:  Jon Haukeland,  e prezantuar me 22 October, 2020,  Mitrovica Social Club

OJQ Aktiv organizoi një shfaqje të dokumentarit Reunion, pjesëmarrësit në shfaqje ishin të rinj nga komunitetet serbe dhe shqiptare.

Steinar Bryn nga Akademia Nansen në Lillehammer, i cili është një nga pjesëmarrësit në film, iu drejtua audiencës përmes transmetimit të drejtpërdrejtë nga Norvegjia si një hyrje e filmit.

Filmi i regjisorit Jon Haukeland bazohet në dokumentarin e mëparshëm Para se bombat të bien (Before the bombs fell) të vitit 1999, i cili flet për një grup studentësh serbë dhe shqiptarë nga Kosova që u takuan pak para luftës në Kosovë. Dhjetë vite më vonë, pjesëmarrësit u takuan përsëri që për herë të parë të shikojnë filmin për veten e tyre. Nxitë një proces psikologjik si tek fituesit, ashtu edhe te humbësit e luftës. Ata që ishin viktima më parë mund të duket se kanë marrë rolin e shtypësve.

Shfaqja shërbeu si baza e një diskutimi interesant që u zhvillua pas filmit.

Aktiv

Thirrje publike për grupe studentore/rinore për të marrë pjesë në një iniciativë thelbësore të bashkëpunimit rinor

“Trajtoni stereotipat ekzistuese dhe paragjykimet në Kosovë”

OJQ AKTIV fton të gjithë grupet studentore/rinore të të gjitha përkatësive etnike të propozojnë iniciativa të bashkëpunimit rinor që do të mbështeten përmes projektit Transformimi i perceptimeve konfliktuale përmes rritjes së angazhimit qytetar dhe komunitetit në Kosovë dhe do të zbatohen nga grupet studentore/rinore.

Brenda kornizës së projektit, dhe pas prodhimit të Indeksit të Stereotipave Etnike në Kosovë (një rekord i konsoliduar i karakteristikave të dokumentuara stereotipike që ndikojnë në marrëdhëniet etnike në Kosovë) studentëve do t’u ofrohet mundësia për të propozuar dhe zbatuar aktivitete bazuar në problemet e identifikuara nga studimi.

Studentët janë të ftuar të propozojnë iniciativa thelbësore të bashkëpunimit rinor (deri në 3) që do të mbështeten përmes këtij projekti dhe do të zbatohen nga studentë, të rinjtë dhe anëtarë të Koalicionit të Kosovës për Pajtim (KKP)

Do të përzgjidhen iniciativat më të mira të cilat do të mbështeten me një grant deri në 5,000 EUR.  Kjo iniciativë do të zbatohet nga KKP në bashkëpunim të ngushtë me grupet studentore/rinore.

Llojet e aktiviteteve që mund të mbështeten nga kjo thirrje janë si në vijim:

  • Projektet lokale të ngritjes së kapaciteteve dhe ndërgjegjësimit që mbështesin/inkurajojnë pjesëmarrjen e të rinjve në monitorimin e reformave, në promovimin e sundimit të ligjit dhe vlerave të BE-së;
  • Dialogu civil me palët lokale të interesit;
  • Organizimi i ngjarjeve publike lokale, debateve, punëtorive, seminareve, vizitave studimore;
  • Realizimi i hulumtimeve dhe sondazheve lokale të opinionit publik;
  • Ngjarje që promovojnë pjesëmarrjen e të rinjve – ekspozita, materiale filmike/video ose aktivitete të tjera të ngjashme;
  • Ngjarjet dhe aktivitetet avokuese;
  • Aktivitete të tjera që mbështesin bashkëpunimin dhe pajtimin ndëretnik.

Llojet e aktiviteteve në vijim nuk do të mbështeten:

  • Çdo aktivitet që zhvillohet jashtë Kosovës;
  • Aktivitete që përfshijnë ose kryesisht përfshijnë sponsorizime individuale për pjesëmarrje në punëtori, seminare, konferenca dhe kongrese;
  • Aktivitete që përfshijnë ose kryesisht përfshijnë bursa individuale për studime ose kurse trajnimi;
  • Aktivitetet e përqendruara në aktivitetet e ndërtimit, blerjen e pajisjeve dhe blerjen dhe/ose rinovimin e ndërtesave ose zyrave;
  • Aktivitete që synojnë mbledhjen e donacioneve bamirëse ose iniciativa të tjera të ngjashme fitimprurëse;

Procedura e aplikimit

Të gjitha propozimet e iniciativës duhet të përfshijnë:

1) Një përshkrim të aplikantit (një ose më shumë), përfshirë informacionin bazë (CV-të e të gjithë aplikantëve), një letër të shkurtër motivuese dhe një kopje të letërnjoftimit të Kosovës;

2) Një përmbledhje të projektit, duke përfshirë:

  • Përfituesit e drejtpërdrejtë.
  • Aktivitetet e projektit
  • Rezultatet e pritshme

3) Një përmbledhje të shkurtër (dy deri në tre fjali) të shpenzimeve të vlerësuara nga aktivitetet.)

Ju lutemi të plotësoni formularin e aplikimit të bashkëlidhur kësaj thirrjeje.

KKP do të mbështesë dhe zbatojë një numër të kufizuar të iniciativave (3) me kohëzgjatje deri në dy (2) muaj dhe me një buxhet maksimal prej 5,000 Euro.

Afati i fundit për dorëzimin e projekt propozimeve është 30.10.2020.

Aplikimet duhet të dorëzohen në:

applications@ngoaktiv.org

Për informata shtesë mund të kontaktoni në e-mail aleksandar.rapajic@ngoaktiv.org ose duke telefonuar +381638050423 dhe + 38349232607.

Sinqerisht,

OJQ AKTIV

alb

Thirrje për punë praktike në Fondin për të Drejtën Humanitare Kosovë

Fondi për të Drejtën Humanitare Kosovë (FDH Kosovë) i fton të gjithë studentët (të vitit të tretë dhe të katërt të studimeve) të Universitetit të Prishtinës, Fakultetit Juridik (publik dhe kolegjeve private), që të aplikojnë për punën praktike në monitorimin e gjykimeve për krimet e luftës në Kosovë. Kohëzgjatja e praktikës do të jetë prej tre (3) deri në gjashtë (6) muaj.

Gjatë periudhës së praktikës, studentë do të kenë mundësi që të marrin pjesë dhe të monitorojnë seancat për krimet e luftës në Kosovë pranë gjykatave të Kosovës, si dhe të mësojnë më shumë për proceset e drejtësisë tranzicionale për gjatë punës në FDH Kosovë.

Ky aktivitet është pjesë e një projekti të gjerë “Transforming conflicting perceptions through increased civic and community engagement in Kosovo” i implementuar nga Kosovo Coalition for Reconciliation (KCR), projekti financohet nga Zyra e Unionit Evropian në Kosovë, si dhe projektit: “Monitoring Conflict Related Crime Trials in Kosovo and the Inclusion of the Youth in the Justice” i financuar nga AmbasadaBritanike në Prishtinë.

FDH Kosovë do t’i mbulon shpenzimet e studentëve të cilët do të angazhohen në monitorimin e këtyre seancave gjyqësore.

Dokumentet e nevojshme:

CV

Letër motivuese

Çertifikata e notave

Si të aplikoj:

Studentë të interesuar duhet t’i dërgojnë dokumente e kërkuara në office@hlc-kosovo.org.

Vetëm studentë të përzgjedhur do të ftohen në intervistë.

Studentët duhet të jenë në vitin e tretë ose të katërt të studimeve bachelor në Fakultetin Juridik, megjithatë studentët në vitin e fundit të studimeve të cilët janë profilizuar në drejtimin penal dhe të drejtës ndërkombëtare do të kenë përparësi;

Studenti/ja duhet t’i ketë përfunduar provimet në të drejtën penale dhe procedurën penale;

Nota mesatare duhet të jetë mbi 7.5;

Njohja e gjuhës serbe është një përparësi;

Studentët të cilët deri më sot nuk kanë kryer ndonjë punë praktike, si dhe studentë nga komunitete të ndryshme që jetojnë në Kosovë inkurajohen që të aplikojnë.

Nëse keni ndonjë pyetje, jeni të mirëseardhur që ti drejtoheni Amer Alija përmes amer@hlc-kosovo.org.

Afati i fundit për paraqitjen e aplikacioneve është 05 nëntor 2020.

(c)MEDDY-

Pjesa e parë e Shkollës Pranverore Feministe 2020

28,29,30.09-01.10.2020

Nga data 28 shtator – 01 tetor 2020, u mbajt pjesa e parë e shkollës pranverore feministë, në Prishtinë me pjesëmarrëset, gra të reja nga Kosova dhe Serbia. Si çdo vit, Shkolla Pranverore Feministe ofroi një hapësirë ​​për gratë e reja që të bashkohen dhe të krijojnë një vizion të përbashkët për lëvizjen feministe në Kosovë dhe Serbi për të luftuar ndikime negative si pasojë e sistemeve patriarkale, dhe të gjitha sistemet që promovojnë luftëra, urrejtje, racizëm, diskriminin, etj. E organizuar me një modalitet më ndryshe se vitet tjera, sivjet, për shkak të mbrojtjes nga Covid-19, gratë e reja nga Serbia nuk kanë udhëtuar në Kosovë, por nga distanca, përmes platformës digjitale kanë komunikuar me gratë e reja nga Kosova. Brenda 4 ditëve, sa zgjati shkolla, të gjithë mësuan shumë gjëra të reja, ku solidariteti dhe fuqizimi ishin fjalët kyçe që u përdorën në këtë punëtori.I falenderojmë për ligjëratat dhe diskutimet e tyre: përfaqësuesen speciale nga BE Reyes Charle Cuellar, prof.Vjollca Krasniqin dhe aktivistet Xhejrane Lokaj, Jeta Krasniqi, Valdete Idrizin, Tijana Simic LaValley, Yllka Soben, Kaltrina Shalen dhe Zana Hoxhën. Projekti “Gratë e reja ndërtojnë paqen në Kosovë dhe Sërbi” implementohet në bashkëpunim me Artpolis-Qendr për Art dhe Komunitet dhe Alternativni Centar za Devojke ndërsa përkrahet nga Unioni Evropian në Kosovë dhe Kvinna till Kvinna.

SSTJ2020-ALB-1

Thirrje për aplikim për shkollën mbi drejtësinë tranzicionale

Fondi për të Drejtën Humanitare Kosovë, në kuadër të projektit “Transformimi i perceptimeve konfliktuale përmes rritjes së përfshirjes së qytetarëve dhe komuniteteve në Kosovë” organizon Shkollën mbi Drejtësinë Tranzicionale. Ftohen të aplikojnë të gjithë të interesuar të moshës 18-25 vjeç, të cilët kanë interesim për të mësuar për Drejtësi Tranzicionale dhe të takojnë të rinjtë të tjerë. Shkolla do të mbahet mes datave 9 -13 nentor 2020.
Për t’u bërë pjesë e kësaj shkolle mund të aplikoni duke e plotësuar këtë formular. https://bit.ly/3jCvI3Q

Në këtë shkollë do të shtjellohen tema lidhur me instrumentet e ballafaqimit me të kaluarën, respektivisht me shtyllat e drejtësisë tranzicionale si: gjykimet për krime lufte, komisionet e së vërtetës, reparacionet dhe reformat institucionale.
Si aktivitete shtesë, pjesëmarrësit. do të njihen më afër me punën e FDH Kosovë, Qendrën e Dokumentimit – Kosovë dhe do të kenë mundësi t’i shkëmbejnë mendimet me ekspertë ndërkombëtarë dhe rajonal të drejtësisë tranzicionale.

Data e fundit për aplikim: 18 Tetor 2020
Të gjitha shpenzimet në lidhje me Shkollën i bartë organizatori.
Përkthimi simulant në gjuhën shqipe dhe serbe do të jetë i siguruar.